ЕҢБЕК АДАМЫ

Арқалық қаласының орталықтандырылған кітапхана жүйесіне қарасты Қайынды ауылындағы кітапхана ісінің шынайы жанашыры, адал қызметкер әрі көрнекті маман – Қуанышова Гүлайым Оразқызы. Ол 2012 жылдан бері Қайынды ауыл кітапханасының қызметін атқарып келеді және осы уақыт ішінде тек кітапханашы ғана емес, кітап пен мәдениеттің нағыз насихатшысы бола білді. Челябі мемлекеттік өнер академиясының «Кітапхана ісі» мамандығын бітірген ол өзінің өмірін толықтай осы салаға арнады.

Гүлайым Оразқызы үшін кітапхана – тек кітаптар сақталатын орын емес, ол жерге келген әрбір оқырман үшін жаңа білім мен шабыттың көзі. Ол жастар мен балалардың кітапқа деген қызығушылығын арттыру үшін түрлі шаралар, әдеби кештер мен кездесулер ұйымдастырып, шығармашылық бағытта белсенді еңбек етіп келеді. Әсіресе, еңбек адамдарының, ұлттық және жергілікті қаламгерлердің шығармашылығына арналған тұсаукесерлер мен кітап таныстыру рәсімдерін өткізіп, көпшіліктің рухани азық алуына жол ашуда.

Гүлайым Оразқызы өзінің талмай істеген еңбегінің арқасында «Қазақстанның құрметті кітапханашысы» төсбелгісімен марапатталып, кітапхана ісін дамытудағы үздік жетістіктері үшін бірнеше диплом мен және «Құрмет грамотасы»  марапатталған. Оның қайталанбас еңбегі мен жоғары кәсібилігі кітапхана ісіне жаңа леп, тың көзқарас әкелді.

Жалпы, Гүлайым Оразқызы өз ісіне деген сүйіспеншілігі мен жауапкершілігінен бөлек, жастардың рухани және мәдени тұрғыдан қалыптасуына зор үлес қосып, олардың әдеби әлемге деген қызығушылығын арттыруда белсенді роль атқаруда. Ол кітапхана қызметін тек жұмыс ретінде емес, қоғамға қызмет көрсету, өскелең ұрпақтың тәрбие мен білім алуы үшін маңызды миссия деп санайды. Ол сонымен қатар, кәсіподақтың белсенді мүшесі ретінде 11 жылдан бері өз әріптестерімен бірге ұйымның іс-шараларына қатысып, жалпы кітапхана қызметкерлерінің құқықтары мен мүдделерін қорғауда да маңызды рөл атқарып келеді.

Қазіргі заманның ағысына ілесіп, заман талабына сай жаңа әдіс-тәсілдерді меңгеріп, кітапхананы тек оқырмандар үшін емес, оларды дамыту мен тұлға ретінде қалыптастыру алаңына айналдыруда Қуанышова Гүлайым Оразқызы үлкен жетістіктерге жетуде. Кітапханашы ретінде ол әрқашан жаңашылдыққа ұмтылып, қоғамдағы мәдениеттің дамуына ықпал етуде.