ЕҢБЕК АДАМЫ

Айдаров Сергей Викторович – «ССГПО» АҚ кен дайындау және байыту цехының ұсатушысы

Сергей Викторович Айдаров өзінің еңбек жолын 2008 жылдың маусым айынан  «Соколов-Сарыбай кен-байыту өндірістік бірлестігі» акционерлік қоғамында бастаған. Осы жылдар ішінде ол сепараторшының шәкіртінен бастап ұсатушылар бригадасының бригадиріне дейінгі ұзақ жолдан өтті. Алғашқы еңбек қызметі грохотшының шәкірті ретінде басталып, уақыт өте келе 3-ші разрядты грохотшы, кейін 4-ші және 5-ші разрядты ұсатушы болып жұмыс істеді. Қазіргі уақытта ол орта және ұсақ ұсату корпусында 6-шы разрядты ұсатушы болып еңбек етуде.

Кәсіпорында еңбек еткен жылдары ішінде Сергей Викторович сепараторшы, бункерші, конвейер машинисі, жөндеуші-слесарь, стропальщик, кран операторы сынды көптеген қосымша мамандықтарды меңгеріп, әмбебап жұмысшыға айналды. Бұл оған өндірістегі түрлі міндеттерді шешуге мүмкіндік берді.

Сергей Викторович үшін кез келген маманға қажет қасиеттер – тәртіптілік, жауапкершілік пен бастамашылдық. Ол әрдайым өзін жетілдіруге тырысады, жұмысын сапалы әрі ықыласпен орындайды, сонымен қатар жас мамандарға көмектесіп, үйретуге дайын. Әріптестерінің құрметі – ол үшін ең үлкен марапат. Оның пікірінше, өндірісте көптеген мәселені тәлімгерлікті дамыту, ұрпақтар арасындағы тәжірибе алмасу, жаңа технологияларды енгізу және жұмыскерлердің өндірісті жақсартуға қатысуы арқылы шешуге болады. Мұндай бастамаларға ол өзі де белсене қатысуда – мысалы, «Идеялар фабрикасы» бағдарламасы мен Кайдзен командасының мүшесі.

Алайда, өндірістегі де, әлеуметтік мәселелерді де жалғыз шешу мүмкін емес. Мұнда ұжымның, әсіресе кәсіподақтың рөлі зор. Кәсіподақ – жай ғана ұйым емес. Бұл – әрбір жұмыскердің дауысы, құқықты қорғауға, мүддені қорғауға, нақты өзгерістерге қол жеткізуге көмектесетін құрылым. Кәсіподақ мүшесі ретінде Сергей Викторович әрдайым еңбеккерлердің құқықтарын қорғау, әлеуметтік кепілдіктер мен еңбек жағдайларын жақсарту мәселелеріне бейжай қарамайды.

Сергей Викторович – үлгілі отбасы иесі, үш ұлдың әкесі. Үлкен ұлы – болашақ энергетик, қазір осы мамандық бойынша оқып жатыр, алдағы уақытта фабрикада еңбек етіп, әке жолын жалғастырғысы келеді. Ортаншы ұлы – жекпе-жек түрлерімен айналысады, жарыстарға бірге қатысып тұрады. Кішісі биыл ғана мектеп табалдырығын аттады – бірінші сыныпқа барды. Сергей Викторович үшін отбасының қолдауын сезіну аса маңызды.

«Үйде сені күтіп отырғандарын білгенде, бұл саған күш пен ынта береді. Егер менің тәжірибем мен еңбекке деген көзқарасым өзгелерге шабыт беріп жатса – демек, мен бәрін дұрыс істеп жүрмін», – дейді Сергей Викторович.