ҚР ҚӘСІПОДАҚТАР  ФЕДЕРАЦИЯСЫНЫҢ  XXVII  СЪЕЗІНІҢ ДЕЛЕГАТЫ ТУРАЛЫ  СӨЗ

ТАНЫС БОЛЫҢЫЗДАР…

КҮШЕТЕРОВА ВАЛЕНТИНА РАХИМЖАНҚЫЗЫ – «Қорғау» Қостанай облыстық білім және ғылым қызметкерлері кәсіподағы» ҚБ төрайымы, Білім басқармасы жанындағы аттестациялық комиссияның, Қостанай облысы кәсіподақтар орталығының үйлестіру кеңесінің және Әлеуметтік әріптестік пен әлеуметтік-еңбек қатынастарын реттеу жөніндегі өңірлік үшжақты комиссияның мүшесі, еңбек ардагері, Ы. Алтынсарин медалінің және «Білім беру ісінің құрметті қызметкері» төсбелгісінің иегері.

Валентина Рахимжанқызының есімі Қостанай облысының білім беру саласымен тығыз байланысты жандарға жақсы таныс. Оның еңбек өтілі – 49 жыл табанды да мінсіз қызметпен өрілген жол. Оның кәсібилігі, өмірлік даналығы мен іске деген адалдығы әріптестерінің, педагогтердің және әлеуметтік серіктестердің шынайы құрметіне ие.

Бүгінде оның басшылығымен 195 бастауыш кәсіподақ ұйымын біріктіретін, 12 000-нан астам мүшесі бар үлкен ұжым жұмыс істеуде. Бұл – жай ғана сан емес, бұл – күн сайын оның қамқорлығына, қорғауына мұқтаж жандар. «Кәсіподақ – бұл кеңседегі жұмыс емес. Бұл – тірі диалог, тұрақты қолдау және әр педагогтың еңбек жағдайын жақсарту», – бұл Валентина Рахимжанқызының басты ұстанымдарының бірі.

Оның басшылығымен «Қорғау» кәсіподағы әлеуметтік әріптестік жүйесін белсенді дамытып, қосымша төлемдер, демалыс, төлемдер және басқа да маңызды мәселелерді қамтитын ұжымдық шарттар жасап келеді. Қостанай облысының кәсіподақтар орталығы және Қазақстан салалық кәсіподағымен бірлесіп, кәсіподақ активінің біліктілігін арттыру, мәселелерді шешу үшін семинарлар мен пікірталастар ұйымдастырылады. Әлеуметтік серіктестердің міндеттемелерін орындауын қадағалау түрлі акциялар мен іс-шаралар арқылы жүзеге асады. Кәсіподақ мүшелерінің құқықтық қорғалуын қамтамасыз ету мақсатында Татуласу комиссиялары құрылып, нәтижесінде 8 мыңнан астам жұмыскердің құқығы қорғалып, 32 миллион теңгеден астам қаржы қайтарылды. Сонымен қатар, кәсіподақ мұқтаж жандарға атаулы көмек көрсетіп келеді: соңғы екі жылда 17 миллион теңгеден астам көмек беріліп, жыл сайын 500-ден астам адам сауықтырылуда, педагогика ардагерлеріне тұрақты қолдау көрсетіледі.

Ізеттілігі, принципшілдігі, күрделі жағдайдан жол таба білетін көшбасшылық қасиеті – оны құрметтеудің басты себептері. Валентина Рахимжанқызы кәсіподақты басқарумен ғана шектелмей, оның әрбір мәселесін жүрегімен қабылдайды.

Валентина Рахимжанқызы – шынайы жанашырлық, рух қуаты мен мол тәжірибе арқылы жүйені өзгертуге болатынын дәлелдеген тұлға. Ол әр адамға жылылықпен қарап, алға сеніммен қадам басуда.