ЖИ ДӘУІРІНДЕ ЕҢБЕК ҚҰҚЫҚТАРЫН ҚОРҒАУ ҮШІН

Қостанай облысының аумақтық кәсіподақтар бірлестігі Қазақстан Республикасы Кәсіподақтар федерациясының Қызылорда қаласында өткен Ұлттық құрылтайдың V отырысында көтерген, жасанды интеллект дәуірінде еңбеккерлерді қорғау жөніндегі Ұлттық стандарт әзірлеу бастамасын толық қолдайды.

Бүгінде жасанды интеллект пен цифрлық технологиялар күнделікті жұмысымызға барған сайын белсенді еніп келеді — еңбек үдерістері, мамандықтар мен талаптар өзгеруде. Алайда әрбір жұмыс орнының артында адам, оның отбасы және ертеңгі күнге деген сенім тұрғанын ұмытпауымыз керек. Сондықтан технологиялар экономиканы дамытуға қызмет етуі тиіс, бірақ еңбек адамдары үшін қауіп-қатерге айналмауы қажет.

Әсіресе ҚРКФ ұсынымдарында нақты әрі түсінікті қадамдардың қамтылғаны маңызды: автоматтандыруды сылтау етіп, негізсіз қысқартулардан қорғау, міндетті қайта оқыту, кадрлық шешімдердегі алгоритмдердің ашықтығы, қызметкердің өзі туралы қандай деректер жиналатынын білу құқығы, сондай-ақ еңбекті қорғау талаптарын жаңарту — себебі цифрлық жүктеме мен күйзеліс те денсаулыққа тікелей әсер етеді.

Біз жасанды интеллект адамның мүмкіндіктерін арттыруы тиіс, ал оны ығыстырып шығармауы керек деп сенеміз. Жергілікті жерлердегі кәсіподақтар бұл жұмысқа атсалысуға дайын, өйткені біз еңбеккерлердің нақты мәселелері мен алаңдаушылықтарын күнделікті көріп отырмыз.

Құрылтай — ел болашағын нақты шешімдер арқылы талқылауға мүмкіндік беретін маңызды алаң. ҚРКФ бастамасын қолдаймыз және оны уақытылы әрі қажет деп санаймыз.