ҚОСТАНАЙ ОБЛЫСЫНЫҢ КӘСІПОДАҚТАРЫ ЦИФРЛЫҚ ДАМУ МӘСЕЛЕЛЕРІ МЕН АЛДАҒЫ КЕЗЕҢГЕ АРНАЛҒАН НЕГІЗГІ МІНДЕТТЕРДІ ТАЛҚЫЛАДЫ

2026 жылғы 5 ақпанда Қостанай қаласындағы Кәсіподақтар үйінде облыстағы салалық және жергілікті кәсіподақтардың аумақтық құрылымдары өкілдерінің Үйлестіру кеңесінің отырысы өтті. Отырыста кәсіподақтар қызметінің негізгі бағыттары, цифрлық трансформация мәселелері, жастар саясаты және «Кәсіподақ диалогы» жобасын іске асыру барысы талқыланды.

Қостанай облысының Кәсіподақ орталығының төрағасы Ирина Аронова Кеңес мүшелерін Қазақстан Республикасы Кәсіподақтар федерациясының Бас кеңесінің отырысында қабылданған шешімдер туралы хабардар етті. Оның айтуынша, бүгінгі таңда кәсіподақ қозғалысының стратегиялық бағыты заманауи технологияларды енгізумен және еңбек құқықтарын қорғау тиімділігін арттырумен тікелей байланысты.

«Цифрландыру — бұл жай ғана технологияларды енгізу емес, адамдарға жедел көмек көрсетуге, кәсіподақ қызметін ашық етуге және нақты деректерге негізделген шешімдер қабылдауға мүмкіндік беретін құрал. Технологиялар еңбек адамына қызмет етуі тиіс», — деп атап өтті Ирина Аронова.

ҚР КФ Стратегиясы аясында 2025–2030 жылдарға арналған кезеңде кәсіподақ мүшелері үшін сенімді цифрлық сервистерді дамыту жоспарлануда. Атап айтқанда, «Менің кәсіподағым» атты жеке кабинет құрылады, онда қызметкерлер өтініш жолдап, кеңес алып және олардың қаралу барысын қадағалай алады. Өтініштерге жауап беру мерзімі 48 сағатқа дейін қысқарады деп күтілуде.

Төрағаның орынбасары Асет Исмагамбетовтің айтуынша, цифрлық трансформация кәсіподақтарды дамыту стратегиясының маңызды бөлігі болып табылады және ұйым мүшелерімен өзара іс-қимылды жеделдетуге, үдерістердің ашықтығын арттыруға әрі қабылданатын шешімдердің сапасын жақсартуға бағытталған.

Отырыста жастар саясатын дамыту мәселесіне де ерекше назар аударылды. Басым бағыттардың қатарында — жас қызметкерлермен практикалық бағыттағы жұмысты күшейту, «Кәсіподақ амбассадоры» жобасын іске қосу және кәсіподақ ұйымдарының кадрлық резервін қалыптастыру бар. Сондай-ақ жастардың басқару үдерістеріне қатысуын кеңейту және жас мамандарды қолдау мәселелерін ұжымдық шарттарға белсенді енгізу ұсынылды.

Жастар кеңесінің қызметі және жас қызметкерлерді кәсіподақ қозғалысына тарту туралы PR-маман Айгерім Жайылғанова баяндады. Оның айтуынша, Кеңес көшбасшылық дағдыларды дамытуға, бастамаларды іске асыруға және кәсіподақ белсенділерінің жаңа буынын қалыптастыруға арналған тиімді алаңға айналуда.

Сонымен қатар Үйлестіру кеңесінің отырыстары аясында өңірлік «Кәсіподақ диалогы» жобасы жүзеге асырылатын болады. Бұл жоба кәсіподақ белсенділерінің, сарапшылардың және еңбек ұжымдары өкілдерінің қатысуымен кәсіподақ қызметінің өзекті мәселелерін ашық талқылауға арналған алаңға айналады.

Отырыс барысында ақпараттық жұмысты одан әрі нығайтудың, жарияланымдардың сапасын арттырудың және қызметкерлердің құқықтарын қорғауға бағытталған кәсіподақ қызметін жүйелі түрде жариялап отырудың маңыздылығы атап өтілді.