ЖАҢА КОНСТИТУЦИЯ: МЕДИЦИНА МЕН БІЛІМ БЕРУ САЛАСЫНДАҒЫ КЕПІЛДІКТЕР САҚТАЛА МА?

Өңірлік коалиция аясында Қазақстан Республикасы жаңа Конституциясы жобасын талқылау өтті. Оған «SENIM» денсаулық сақтау қызметкерлері салалық кәсіподағы филиалының төрайымы Татьяна Булгацевич қатысты.

Кездесулер барысында ең жиі көтерілген мәселелер денсаулық сақтау мен білім беру салалары болды. Негізгі сұрақ — қолданыстағы кепілдіктер сақтала ма?

Қолданыстағы Конституцияда азаматтардың тегін кепілдендірілген медициналық көмек көлемін алуға және мемлекеттік оқу орындарында тегін орта білім алуға құқығы бекітілген.

Жаңа Конституция жобасында тұжырымдамалар өзгертілген: «тегін» сөзінің орнына «олардың өздері төлемейтін» деген тіркес қолданылған, сондай-ақ бастауыш және орта білімнің міндеттілігі нақтыланған.

Дәл осы тұжырымдаманың өзгеруі азаматтар арасында алаңдаушылық туғызды.

Татьяна Булгацевичтің айтуынша, Конституция жобасында негізгі қағидат — Қазақстанның әлеуметтік мемлекет екендігі сақталған. Бұл мемлекет әлеуметтік кепілдіктер мен медициналық және білім беру қызметтерін қаржыландыру бойынша жауапкершілікті өз мойнында қалдырады дегенді білдіреді.

Медициналық көмек үш бағыт бойынша көрсетіледі: кепілдендірілген көлем, міндетті әлеуметтік медициналық сақтандыру және жекеменшік медицина.

«SENIM» денсаулық сақтау кәсіподағы жоба талқылауын мұқият қадағалап, сала қызметкерлері мен елдің барлық азаматтарының әлеуметтік кепілдіктерін қорғауды жалғастырады.