ЖАСТАР — КӘСІПОДАҚТАРДЫҢ СТРАТЕГИЯЛЫҚ РЕСУРСЫ: ҚОСТАНАЙДА «КЕЛЕШЕК» КЕҢЕСІНІҢ ОТЫРЫСЫ ӨТТІ

11 ақпанда кәсіподақтар үйінде Қостанай облысының салалық және жергілікті кәсіподақтарының аумақтық құрылымдары жанындағы жастармен жұмыс жөніндегі «Келешек» кеңесінің отырысы өтті.

Отырысты Қостанай облысының кәсіподақтар орталығының төрайымы Ирина Аронова ашты. Кездесу барысында ол қатысушыларды конституциялық реформаның негізгі ережелерімен таныстырып, Конституцияның жаңартылған редакциясының мемлекеттік саясаттың әлеуметтік бағытын нығайтудағы және азаматтық қоғам институттарын дамытудағы маңызын атап өтті.

«Жаңартылған Конституция азаматтардың қоғамдық үдерістерге қатысу мүмкіндіктерін кеңейтеді. Осындай жағдайда жастардың белсенді, бастамашыл болып, елдің және кәсіподақ қозғалысының болашағы үшін жауапкершілік алуға дайын болуы аса маңызды», — деп атап өтті ол.

Күн тәртібіндегі негізгі мәселелердің бірі «Келешек» жастармен жұмыс жөніндегі кеңесінің құрамын қалыптастыру болды. Талқылау қорытындысы бойынша өңірдің жұмыс істейтін жастары арасынан белсенді әрі бастамашыл өкілдер енген жаңартылған құрам бекітілді. Кадрлық жаңару кәсіподақтардың жастар қанатының дамуына қосымша серпін беріп, жүзеге асырылатын бастамалардың тиімділігін арттырады деп күтілуде.

«Келешек» жастар кеңесінің төрағасы Ерасыл Қазыбаев қатысушыларға 2025 жылғы жұмыс қорытындылары туралы есеп беріп, жас қызметкерлерді қолдауға және олардың кәсіподақ қызметіне тартылуын арттыруға бағытталған жүзеге асырылған жобаларға, білім беру және әлеуметтік іс-шараларға жан-жақты тоқталды.

Сондай-ақ отырыс барысында 2026 жылға арналған іс-шаралар жоспары қаралып, бірауыздан қабылданды. Жоспарда Кеңестің алдағы жұмысының басым бағыттары айқындалды.

Қатысушылар кәсіподақтар федерациясының жастар қозғалысын дамытуға бағытталған бастамаларына ерекше назар аударды. Атап айтқанда, жергілікті жерлерде белсенді кәсіподақ жастарының желісін қалыптастыруға бағытталған «Кәсіподақ амбассадоры» жобасын іске асыру жоспарлануда. Жоба жас қызметкерлерді кәсіподақ қызметіне тартуға, олардың көшбасшылық құзыреттерін дамытуға және кәсіподақ ұйымдарының кадрлық резервін қалыптастыруға бағытталған.

Қаулының жеке тармағында жастардың кәсіподақ ұйымдарының басқару үдерістеріне қатысуын кеңейту қажеттігі атап өтілді. Атап айтқанда, сайланбалы алқалы органдар құрамында кемінде 20 % жастар квотасын қарастыру және жастар кеңестерін құру мен дамыту жұмыстарын жандандыру ұсынылды.

Бағдарламаның қорытынды бөлімінде SMM-сарапшы Флорида Токбаева «Цифрландыру дәуірінде Instagram — жастар кеңесінің құралы» тақырыбында сөз сөйледі. Спикер әлеуметтік желілерді жүргізудің заманауи тәсілдері, қызықты контент жасау және жастар аудиториясымен тиімді коммуникация орнату туралы айтып, цифрлық платформалардың бүгінгі таңда кәсіподақ бастамаларын ілгерілетудің маңызды құралына айналғанын атап өтті.

Отырыс конструктивті әрі іскерлік жағдайда өтіп, кәсіподақ жастарының белсенді жұмысқа, жаңа жобаларды жүзеге асыруға және өңірдегі кәсіподақ қозғалысында жастардың рөлін нығайтуға дайын екенін көрсетті.