Еңбек адамы — ел мақтанышы

Елімізде еңбекқор адам,кәсіби маман мемлекетімізді дамытуға аянбай тер төккен жандар.

Әр саланың өз қиындығы мен қызығы болады. Ал,кәсібінің шебері болу өз мамандығына адал, жауапкершілігі мол жандардың қолынан келеді.

Адал еңбегімен елге сыйлы жандардың бірі Қ.Әбенов атындағы аудандық мәдениет үйінің әдістемелік меңгерушісі, мәдениет майталманы — Мизамбаева Лиза Таутанқызы. Саналы ғұмырын осы салаға арнап, 38 жыл үздіксіз мәдениет пен өнерге қызмет жасап келеді. Еңбек жолын 18 жасынан бастаған Лиза Таутанқызы бүгінде білікті де,білімді,тәжірибесі мол,ойы ұшқыр сценарист, режиссер, кіші буын жастарды тәрбиелеп отырған тәлімгер. Еңбек жолы өскелең ұрпаққа өнеге,үлгі.  Лиза Таутанқызы бастауыш кәсіподақ ұйымының төрайымы. Кәсіподақ ұйымындағы жұмысына 17 жыл.Лиза Таутанқызының жүріп өткен дара жолы шығармашылық шабыт пен қажырлы еңбек,үздіксіз іздену,шәкірт тәрбиелеуімен қызықты.

Лиза Таутанқызының өскелең ұрпақ тәрбиесіне қосып келе жатқан үлесі зор. Жастар мен жасөспірімдерге арналған “Түйме қыз”,”Ақ желкен”,”Ер Төстік”,”Жұлдызды сәт”,”Ақ моншақты Арулар”,”Ертегі аруы”,”Томирис”,”Инабатты келін,есті ене”,”Шаңырақ” т.б байқаулар мен жобалары көптің көңілінен шығып,ел ықыласына бөленіп жүр.

Осы байқауларының ішінде “Ақ желкен” жас әншілер байқауы қаншама өнерлі өрендердің бағын ашып, өнерлеріне бастау бола білді. Бүгінде,шәкірттері үлкен сахнада жүр. Журналистика,медиа саласында жүрген шәкірттері қаншама.

Аудан өнері мен өнерпаздары туралы “Өнер — таусылмас қазына, сарқылмас — байлық” атты кітаптың авторы. Әлеуметтік желіде белсенді. Өнерлі отбасылар туралы “Жарастық”,” Ана -өмір шуағы” атты онлайн жобалары көпшіліктің көңілінен шыға білді.

Иә,өз несібесін еңбектен тапқан жанға көрсетілер сый -құрметтің болуы заңдылық. Мәдениет саласындағы еңбегі еленіп ҚР “Мәдениет саласының үздігі” төсбелгісі, ҚР “Тәуелсіздігіне-30 жыл”, мерекелік медалі, Қазақстандық салалық мәдениет,спорт,туризм және ақпарат қызметкерлері кәсіптік одағының “ Еңбек даңқы” төсбелгісі,Халық батыры Амангелді Үдербайұлының 150 жылдық мерейтойының естелік медалінің иегері.