МЕМЛЕКЕТ ПЕН ҚОҒАМҒА ҚЫЗМЕТ ЕТУ

Мемлекеттік қызметші күні қарсаңында Кәсіподақтар үйінде Мемлекеттік, банк мекемелері және қоғамдық қызмет көрсету қызметкерлерінің салалық кәсіподағының «Қызмет» қоғамдық бірлестігінің Қостанай филиалы ұйымдастырған салтанатты кездесу өтті.

Іс-шараға Қостанай облысы Кәсіподақтар орталығының төрағасы Ирина Петровна Аронова, салалық кәсіподақтың Қостанай филиалының төрағасы Гульнара Дәлібайқызы Донбаева, Қостанай облысы әкімдігі аппаратының Әдеп жөніндегі уәкілі Қайрат Жанділдинұлы Сүндіков, «Қызмет» кәсіподағы Федоров аудандық филиалының төрағасы, кәсіподақ қозғалысының ардагері Зоя Андреевна Шашкова және облыстың кәсіподақ белсенділері қатысты.

Кездесуді ашқан Гульнара Дәлібайқызы Донбаева әріптестерін келе жатқан кәсіби мерекемен құттықтап, мамандыққа адалдығы, белсенді қоғамдық қызметі және кәсіподақ қозғалысының дамуына қосқан үлесі үшін алғысын білдірді.

Қатысушыларға құттықтау сөз сөйлеген Ирина Петровна Аронова мемлекеттік қызметшілердің қоғам дамуындағы ерекше рөлін атап өтіп, кәсіподақтардың еңбеккерлердің құқықтары мен заңды мүдделерін қорғаудағы маңыздылығына тоқталды.

«Әрбір жетістіктің артында өз ісіне адал, қоғам мен мемлекетке қызмет етіп жүрген жандар тұрады. Осындай білікті мамандар – еліміздің сенімді тірегі», – деп атап өтті Ирина Петровна.

Кездесу барысында Қайрат Жанділдинұлы Сүндіков пен Зоя Андреевна Шашкова да ізгі тілектерін білдіріп, мемлекеттік қызметшілерге кәсіби табыс, амандық және еңбектеріне толайым жетістіктер тіледі.

Салтанатты жиынның шарықтау шегі марапаттау рәсімі болды. Көп жылғы адал еңбегі, жоғары кәсіби шеберлігі және белсенді қоғамдық қызметі үшін саланың үздік өкілдері Мемлекеттік, банк мекемелері және қоғамдық қызмет көрсету қызметкерлерінің салалық кәсіподағының «Қызмет» медальдарымен марапатталды. Сонымен қатар, салалық кәсіподақтың, Қостанай облысы Кәсіподақтар орталығының және салалық кәсіподақтың Қостанай филиалының Алғыс хаттары табыс етілді.

Салтанатты кездесу қоғам игілігі жолында күн сайын адал еңбек етіп, мемлекеттік институттардың дамуына және кәсіподақтар ынтымақтастығы дәстүрлерінің нығаюына үлес қосып жүрген азаматтарға құрмет пен ризашылық білдірудің жарқын көрінісі болды.