Ұжымдық шарт – еңбек қатынастарының әлеуметтік кепілі

«Ортақ күш-жігермен еңбекті қорғаудың оң мәдениетін қалыптастыру» ұранымен өтіп жатқан Дүниежүзілік еңбекті қорғау күні аясында Қостанай облысының аумақтық кәсіподақтар бірлестігі «Ұжымдық шарт – еңбек қатынастарының әлеуметтік кепілі» тақырыбында дөңгелек үстел өткізді.

Дөңгелек үстел жұмысына Қостанай қалалық прокуратураның аға прокуроры, еңбек инспекциясы жөніндегі басқарманың өкілі, салалық және жергілікті кәсіподақтардың, бастауыш кәсіподақ ұйымдарының аумақтық құрылымдарының төрағалары қатысты.

Еңбек қатынастарын ұжымдық-шарттық реттеу мәселелері қазіргі уақытта еңбек заңнамасының өзекті бағыты болып табылады. Ұжымдық шарттардың негізгі әлеуметтік міндеті — бұл еңбек қатынастары жүйесін тепе-теңдікте ұстау, бұл өз кезегінде әлеуметтік келісімге қол жеткізумен және әлеуметтік кепілдіктерді жүзеге асырумен бірге экономиканың тиімділігінің өсуіне ықпал етеді.

Облыста 14 174 кәсіпорын жұмыс істейді. «Қостанай облысының еңбек инспекциясы жөніндегі басқармасы» ММ деректері бойынша 2021 жылғы 01 сәуірдегі жағдай бойынша қолданыстағы ұжымдық шарттардың саны 9 168 шартты немесе облыстағы жұмыс істеп тұрған кәсіпорындардың жалпы санының 64,7%-ын құрайды. Салалық және жергілікті кәсіподақтардың белсенді жұмысының арқасында кәсіподақ ұйымдары бар кәсіпорындарды ұжымдық шарттармен қамту деңгейі 100% құрайды, бүгінде бұл ұжымдық шарттар жасасқан 1374 бастауыш кәсіподақ ұйымы. Осы ұжымдық шарттардың мазмұны қаншалықты сапалы, оларды кім басқарады, ұжымдық шарттың талаптары кімге қолданылады, ұжымдық шарт неге маңызды және қажет? Осы және басқа да мәселелер дөңгелек үстелде қаралды.

Қостанай облысы Кәсіподақ орталығының төрайымы Ирина Аронова кіріспе сөзінде кәсіподақтар қызметінде әлеуметтік әріптестік негізінде әділ еңбек қатынастарын дамыту мәселелері маңызды бағыт болып қала беретінін атап өтті. Ұжымдық шарттар кәсіподақ мүшелерінің еңбек, әлеуметтік – экономикалық құқықтары мен мүдделерін қорғау нысаны болып табылады.

Биылғы жылы Қазақстан Республикасы кәсіподақтар Федерациясы Әлеуметтік әріптестік жылы аясында өтетін «2022 жылдың үздік ұжымдық шарты» атағына арналған республикалық байқау — конкурсын жариялады.

Дөңгелек үстел жұмысын Қостанай облысының Кәсіподақ орталығы төрағасының орынбасары Әсет Исмағамбетов жалғастырды. Өз сөзінде ол кәсіподақ ұйымдарының әлеуметтік-еңбек қатынастарын ұжымдық-шарттық реттеудің тиімділігін жетілдіру және арттыру жөніндегі жұмысына назар аударды.

Қостанай қалалық прокуратураның аға прокуроры Батырхан Бажкенов еңбек заңнамасы бұзушылықтарының профилактикасы жайлы сөз қозғады.

«SENIM» Денсаулық сақтау жүйесі жұмыскерлерінің салалық кәсіптік одағы» ҚБ филиалының төрайымы Татьяна Булгацевич және «Қостанай облысының Білім және ғылым ұйымдары жұмыскерлерінің жергілікті кәсіподағы» ҚБ төрағасы Василий Цымбалюк дөңгелек үстел қатысушыларын ұжымдық шарттың артықшылықтары және оны жасасу қажеттілігі туралы айтты.

Сондай-ақ, кәсіподақ ұйымдары тап болатын проблемалар туралы айтты (ұжымдық шарттың тармақтарын орындамау, уәкілетті органдар тарапынан тиісті емес бақылау және оларды немқұрайлы түрде жасасу).

Соңында дөңгелек үстел қатысушылары пікір алмасып, көкейтесті сұрақтар қойды және қазіргі проблемаларды шешу бойынша тиісті ұсынымдар жасады.

#kasipodaqkz #profsoyuz