34 ЖЫЛДЫҚ МАМАНДЫҚҚА АДАЛДЫҚ

«Қостанай минералдары» АҚ техникалық бақылау өндірістік зертханасының асбест байыту өндірісінің зертханашысы Наталья Николаевна Шиллер кәсіпорынға өмірінің 34 жылдан астам уақытын арнады.

Ол комбинаттағы еңбек жолын 1992 жылы өндірістік зертхананың сынама алушысы болып бастады. Уақыт өте келе асбест байыту өндірісінің зертханашысы мамандығын меңгеріп, бүгінде байыту цехының «Б» ауысымында зертханашы-бригадир болып еңбек етуде. Сонымен қатар Наталья Николаевна «Қостанай минералдары» АҚ басқармасының бастауыш кәсіподақ ұйымының мүшесі ретінде ұжымның қоғамдық өміріне белсенді қатысады.

Қазіргі таңда оның жетекшілігімен зертханашылар мен бақылаушылар бригадасы жұмыс істейді. Ол байыту кешенінің операторларымен және диспетчерлік қызметпен өзара байланысты үйлестіріп, зертханалық жабдықтардың жұмысын және технологиялық талаптардың сақталуын қадағалайды. Оның жауапкершілік аймағына кендегі, геологиялық және забойлық сынамалардағы, сондай-ақ технологиялық қалдықтардағы хризотил талшығын алу көрсеткіштерін бақылау кіреді. Бұдан бөлек, Наталья Николаевна ауысым, тәулік, апта және ай бойынша өндірістік көрсеткіштердің есебін жүргізеді.

Әріптестері Наталья Николаевнаны сауатты әрі тәжірибелі маман, сабырлы, жауапты және сенімді жан ретінде жақсы таниды. Оны жұмысты ұйымдастыра білуі, ұжымды қолдауы және ауысымда жайлы атмосфера қалыптастыра алатыны үшін жоғары бағалайды. Ол өзіне жүктелген барлық тапсырмаларды сапалы әрі уақытында орындайды.

Наталья Николаевна әріптестері арасында зор құрметке ие. Ол күрделі өндірістік жағдайдағы еңбектің ерекшелігін жақсы түсінеді және әрдайым қасындағы адамдарға көмек көрсетуге дайын.

Наталья Николаевна өзінің басты байлығы ретінде ұлы Данил мен қызы Диананы атайды. Ол оларды тәрбиелі, парасатты азамат етіп өсірді.

Көпжылдық адал еңбегі мен жоғары кәсібилігі үшін Наталья Николаевна бірнеше рет грамоталармен, алғыс хаттармен және ақшалай сыйақылармен марапатталды. Ал 2025 жылы оның суреті «Қостанай минералдары» АҚ-ның «Мақтаныш» тақтасына енгізілді.

Наталья Николаевнаның өмір жолы — мамандыққа адалдықтың, жауапкершіліктің және өз еңбегіне деген шынайы құрметтің жарқын үлгісі.